「火箭」奧蘇利雲:「50歲前我要再奪2個世界冠軍！」

文：MenClub 波特先生　　圖：互聯網
POSTED ON 02 Mar 2018


喺岩岩過去嘅桌球大獎賽，「火箭」奧蘇利雲輕鬆以局數10:3擊敗中國球手丁俊暉，取得佢今季第4個排名賽冠軍，其狀態可以話勢不可擋，無佢拎唔到嘅冠軍，就只有佢想唔想拎而已。

岩岩奪得嘅桌球大獎賽，除左係「火箭」今季第4個嘅排名賽冠軍之外，亦都係其生涯第32個排名賽冠軍，距離桌球歷史奪得排名賽次數最多嘅亨特利36次僅相差4個冠軍，以如今「火箭」嘅狀態，佢絕對有咁嘅能力打破其紀錄。

而目前「火箭」已經打緊威爾士公開賽，首輪因對手退賽不戰而勝晉級64強，然後喺64強面對曾奪得世界冠軍嘅Graeme Dott，「火箭」繼續無敵嘅狀態以局數4:0橫掃對手出局，強勢晉級32強。隔日，「火箭」喺32強面對David Grace以同樣局數4:0橫掃對手，進入16強佢又一次以4:0擊敗Mike Dunn，其表現可以話完全無人能擋。


對於自己嘅狀態，「火箭」明顯信心爆棚，這位42歲嘅老將嘅技術可以話已經進入爐火純青嘅地步，而佢目前對比賽仍然有火，佢表示自己嘅目標係可以追平亨特利7奪世錦賽冠軍。

對於自己呢個目標，「火箭」表示自己希望可以喺50歲前完成。不過要想喺未來8年保持佳態對於老將黎講並唔容易，好可能需要配合極多嘅訓練，而訓練正正係呢位天才球手不太鍾意做嘅野，但事實係佢可能真係唔需要太多嘅訓練。「火箭」表示自己喺大師賽後有1個月無進行練習，然後就去大獎賽試下自己嘅狀態，最終大家見到佢輕鬆奪得冠軍。

目前「火箭」更享受自己嘅生活，並希望活得養生一點，所以並唔會參加太多比賽，當其他球手不斷參加比賽燃燒生命嘅時候，佢就喺度叉緊電。

對於一名運動員如果能夠戰至50歲絕對唔容易，更何況仲可以保持世界最頂級嘅實力，作為球迷必定會繼續支持「火箭」，但係對於其對手黎講可能就係壞消息了。