【一生之敵】宿敵希堅斯令最強「火箭」都要稱臣！

文：MenClub 波特先生　　圖：互聯網
POSTED ON 05 Mar 2018


如果要數今季表現最出色嘅桌球手，相信絕對非目前名世界第二嘅「火箭」奧蘇利雲莫屬，呢位42歲嘅老將今季已經先後奪得4項排名賽冠軍，手感相當火熱。基本上唔少人都認為，無奧蘇利雲贏唔到嘅比賽，只有佢願唔願意贏而已。

而喺近日舉行嘅威爾士公開賽，有份參賽嘅奧蘇利雲並無奪冠而回，佢早喺8強就已經墮馬，而今次出局並唔係佢想快啲輸左可以去放假，而係真係被對手狠狠咁擊敗。今次擊敗「火箭」嘅並唔係其他人，而係「火箭」自己都好熟悉嘅老對手希堅斯。

與「火箭」同期出道嘅希堅斯，現年都係42歲，佢地兩個青年時期已經相識，一直到成為職業球手，大家都非常接近，甚至排名都係你爭我奪。而今次奪得威爾士公開賽冠軍後，希堅斯生涯已經奪得31次排名賽冠軍，僅落後「火箭」1個而已，可想而知兩人絕對可以稱得上為一生宿敵。

講番今次威爾士公開賽，「火箭」喺頭3場比賽不失一局下均以4:0大勝對手，氣勢正盛。相反希堅斯一路晉級已經失過3局，因此二人喺八強對上，「火箭」都被睇高一線。不過，最終希堅斯成場比賽都無比機會奧蘇利雲，以局數5:1大勝呢位老對手，並且一路高歌猛進，最終更奪得賽事冠軍。

值得一提嘅係，奧蘇利雲同希堅斯曾對賽65次，雙方戰績接近，並無一面倒嘅情況，所以今次落敗相信「火箭」也必定心服口服。