其實呢間並唔係普通五金車間，實質係一間名叫「Ban Hun Lek」嘅金屬工藝工作室，入面啲人專門用金屬廢料創造各個電影角色，之前已整過Iron Man、Iron Patriot、大黃蜂、黑武士、《加勒比海盜》嘅Jack Sparrow船長等，而Hulk就係最新作。

仔細啲睇，呢隻「Iron Hulk」嘅大部分身軀都係用螺絲帽砌成，但難得肌肉嘅起伏層次完全做到晒出嚟，更有埋凸起嘅血管同青筋，連樣貌同神態都整得勁似，絕對係誠意之作，莫講話再一次收大陸啲山寨變形金剛皮，就連香港漫畫星光大道啲巨型港漫角色雕像，相比之下都要輸呀！以呢班高手嘅手工，若然佢哋整埋細figure拎去賣，應該賺大錢喎。