買《蟻篇》DVD 送實體「軍儀」

文：MenClub 魏文青　　圖：互聯網
POSTED ON 29 Oct 2014

好啦，自從早幾個月富奸「又」重新連載Hunter X Hunter，畫咗一個超展開而且非常有可能收唔到科嘅「黑暗大陸」開頭，近呢幾個星期果然又「不負眾望」地以腰痛為名暫停連載。當然呢啲成日都發生嘅事我哋冇可能會當「新聞」同大家講，之但係上月上市嘅「蟻篇」DVD/BD BOX SET就好值得同大家講下。

唔講大家可能唔覺，原來「蟻篇」早於十一年前開始連載，期間經過「史上最強」的休刊事件、草稿作畫等等，橫跨133話、13本單行本，成為「Hunter X Hunter」入面無論連載時間同份量最多的單元。雖然好多人都話最後「王」的結局非常無稽，但我就認為「王」與「小麥」的一段情相當感人！

講起小麥，又點可以唔提她與「王」相識的契機－「軍儀」呢？呢種貌似象棋，但又多咗「忍」、「弓」，而且可以好似飛行棋咁疊起黎玩嘅神秘棋盤遊戲，在整個「蟻篇」可謂擔當住一個非常重要的角色。以富奸的性格，連「貪婪之島」嗰百幾張卡都寫哂出黎，但就從來都冇真正解釋過令「王」都沉迷的「軍儀」究竟係咩玩法，不禁令人懷疑其實佢都冇諗過！不過咁，假如你喺11月之前一次過預購「蟻篇」的DVD/BD BOX SET一套四盒，年尾就會收到一盒官方出嘅「軍儀」，有可能附上玩法！到時富奸又擸一筆版權費，佢又可以休刊啦！