世界足協(FIFA)已經決定將固有嘅世界冠軍球會盃(下稱:世冠盃)改組，由現時各個大洲嘅冠軍進行對決，變成由24支球隊進行小組及淘汰賽，而目前最新確認會參賽嘅球隊就有英超嘅曼聯同埋利物浦。

就目前預計，新世冠盃將會由2021年展開，屆時歐洲多支強隊都將會參戰，除左上面提到嘅曼聯同利物浦之外，皇馬、巴塞、拜仁、AC米蘭、國際米蘭、祖雲達斯、阿積士及巴黎聖日耳門都已經確認會參賽。

新世冠盃方面，歐洲賽區24個名額入面佔有12個，所以除左以上10支球隊之外，另外兩支球隊將會由曼城、車路士、馬體會、多蒙特、波圖及賓菲加中選出。

而另外嘅12個名額則由世界各地嘅球隊分別選出，其中南美洲區會有4個名額，好似小保加、河床、山度士、法林明高等美洲勁旅都喺候選之列，另外南美洲額名仲有一個名額將會同大洋洲代表進行爭奪。而非洲、北美洲、亞洲則各有兩個名額，再加上主辦國亦都有一個名額。

新世冠盃嘅舉行日期其實亦已經擬定好，將會由6月10-28日舉行，24支球隊將會分為8組，每組3隊，然後每組有1支隊伍能夠出線，從而定出8強球隊，其後再進行淘汰賽。而呢個賽制，每支參賽球隊將至少會踢兩場比賽，而最多則會踢5場比賽。

由於過去嘅世冠盃，大多數都會由歐聯嘅冠軍得主(亦即係歐洲冠軍)取得冠軍，所以今次改組將令賽事變得更具競爭性，從而增加賽事嘅觀賞性令更多人關注及入場睇比賽。

另外值得一提嘅係，目前主辦國雖然仲未決定，但係有傳中國將好大機會成功爭取到成為新世冠盃嘅主辦國，如果佢地真係可以成功舉辦世冠盃的話，將大大增加佢地未來爭取舉辦世界盃嘅本錢。