世界盃越黎越迫近，大部份國家隊亦已經相繼公佈自己最後征戰嘅23人陣容名單，而黎到今日2010年世界盃冠軍西班牙亦正式公佈23人名單！不過，有部份為球迷所認識嘅球員就未有入選，其中好似法比加斯、比利連、莫拉達及查維馬天尼斯。

門將：迪基亞(曼聯)、連拿(拿坡里)、艾利沙巴拿加(畢爾包)

後衛：卡華積(皇馬)、奧德里奧索拉(皇家蘇斯達)、碧基(巴塞)、拉莫斯(皇馬)、拿祖費南迪斯(皇馬)、艾施派古達(車路士)、佐迪艾巴(巴塞)、馬高斯阿朗素(車路士)

中場：布斯基斯(巴塞)、沙奧尼古斯(馬體會)、恩尼斯達(巴塞)、泰亞高(拜仁)、高基(馬體會)、伊斯高(皇馬)

前鋒：大衛施華(曼城)、阿辛斯奧(皇馬)、華斯基斯(皇馬)、迪亞高哥斯達(馬體會)、施巴斯坦洛迪高(華倫西亞)、艾斯帕斯(切爾達)

可以睇到西班牙呢套陣容一如以往主要由皇馬(6位)及巴塞(4位)兩支西班牙班霸所組成，再加上部份馬體會(3位)及黎自其他球會嘅球員。

而整體上睇，西班牙呢套陣容都係攻守平衡，球員有老有嫩，而大部份則都係處於當打階段，所以經驗及實力都非常的高。

前線上，西班牙有帶領曼城奪得英超冠軍嘅大腦級球員大衛施華，又有皇馬天才球員阿辛斯奧；中場有近兩季喺皇馬大放異彩嘅伊斯高，又有巴塞兩位核心恩尼斯達及布斯基斯，馬體會嘅高基亦都係非常出色嘅球員；後防拉莫斯及碧基繼續穩守中路，兩閘有卡華積及艾巴；門將更有曼聯最佳球員迪基亞。所以就咁睇西班牙實力絕對係今屆世界盃嘅前三球隊。

2010年奪得世界盃冠軍嘅西班牙，上屆陣容上處於換屆嘅情況，所以最終佢地喺小組賽就已經出局，令唔少球迷相當失望。不過今屆西班牙勢必捲土重來，陣容完整、人腳當打，相信一定會交到功課，會唔會有機會繼2010年後再奪冠軍呢？球迷們拭目以待！