岩岩嘅歐聯決賽中，雖然比賽因為沙拿被拉莫斯整傷係一大轉捩點，但事實上利物浦因為門將卡利奧斯兩次世界級失誤先係導致球隊落敗嘅主因。賽後，卡利奧斯向現場球迷致歉，而球迷亦為佢鼓掌以作支持。不過，唔少人都認為卡利奧斯嘅生涯已經玩完，而日前亦有消息指利物浦有意收購門將，睇黎卡利奧斯未來真係難留紅軍。

最新消息指，利物浦領隊高普有意再向羅馬出手，希望能夠羅致佢地嘅正選巴西門將阿里遜(Alisson Becker)。此前利物浦已經從羅馬身上簽得沙拿，所以今次佢地想食過番尋味，再次從羅馬隊簽人。另外，由於今屆歐聯4強利物浦亦對過羅馬，所以高普亦都因此睇中阿里遜。

不過羅馬方面並唔會輕易放走阿里遜，有指佢地希望從利物浦身上獲得至少6000萬鎊嘅轉會費。以目前英超球隊嘅收入，再加上今屆成功打入歐聯決賽，利物浦絕對有能力去支付呢筆轉會費。

現年25歲嘅阿里遜，2016年7月由國際體育會加盟羅馬，不過由於當時球隊陣中有舒捷斯尼，所以加盟第一季阿里遜就只係上陣左15場比賽，其中聯賽一場未出。其後舒捷斯尼轉會祖雲達斯，阿里遜正式成為羅馬1號門將，並表現出色下助球隊奪得意甲第三名，而歐聯更反勝巴塞打入四強。

國家隊方面，阿里遜成功壓倒曼城門將艾達臣，成功奪得巴西隊1號門將位置，如果佢能夠喺世界盃交出好表現，相信佢嘅身價會進一步增加。