田徑場上嘅傳奇跑手「閃電」保特，去年已經正式退役結束跑手生涯。不過，呢位100米及200米世界紀錄保持者並未有結束運動員生涯，因為佢已經轉職到佢一直鍾愛嘅另一項運動 - 足球。

相信唔少朋友都知道，保特一直鍾意足球，並且係「紅魔鬼」曼聯嘅球迷，而佢亦曾經發話希望可以加盟曼聯實現自己嘅其中一個夢想。不過，曼聯作為一支最頂級嘅球隊，好難真係突然比一個位置唔係職業球員嘅保特。

因此，保特只好退而求其次，此前佢曾跟德國勁旅多蒙特跟操，但結果佢只能夠加盟挪威超級聯賽球隊特羅姆加斯特，並接受正式嘅足球訓練。而日前，保特亦正式迎來自己作為足球員嘅首場比賽，其球衣更係球壇罕見嘅9.58號，以紀念佢100米世界紀錄9.58秒。

呢場保特嘅首Show係一場熱身賽，對手係挪威U19國家隊，而入場嘅球迷雖然只有數百人，但係31歲嘅佢後備上陣20分鐘下，仍然令現場球迷大呼小叫。而其間保特亦曾經展示其短跑加速嘅實力，但係卻未能換來入球。最終，保特嘅球隊以1球不敵對手，但係能夠見證曾經係地球上最快嘅人類轉職，都非常值得了。

未來，保特將會參加更多足球比賽，其中包括黎緊將於奧脫福舉行嘅一場慈善賽，屆時相信保特會有更多展示實力的機會！