今屆俄羅斯世界盃，作為球迷們最熱愛嘅球隊之一，阿根廷早早已經喺16強不敵法國出局，令唔少人相當失望，特別係因為美斯嘅關係。

坐擁五座金球獎嘅美斯，可以話係地球上足球天賦，以至足球技術最高嘅球員，佢喺球會巴塞隆拿方面已經奪得一切。可惜嘅係，31歲嘅佢卻始終未能帶領阿根廷奪得國際大賽嘅冠軍，即使阿根廷擁有相當唔錯嘅陣容。

作為傳統南美勁旅，阿根廷基本上都係人才輩出，今屆世界盃前鋒線上除左有美斯之外，就有阿古路、希古恩、戴巴拿，中場又有迪馬利亞、賓尼加、馬斯查蘭奴，後防亦有盧祖、奧達文迪、法沙奧等，雖則後防算係佢地最簿弱嘅一環，但單憑前鋒線都足以令佢地成為世界級勁旅。

不過如果你有睇今屆阿根廷嘅比賽，相信你都會睇到好失望，因為佢地小組賽踢得相當差，能夠出線已經算得上非常幸運。而作為球場上嘅焦點，美斯每一場比賽都被對方嚴密看管，而結果就係阿根廷嘅進攻變得停滯不前。最終，阿根廷喺16強面對強大嘅法國，需要佢地拼死入左3球，但就都係以3:4落敗出局。

阿根廷出局，阿根廷足總理應痛定思定，究竟係足總嘅問題？係教練調兵遣將有問題？定係球員未能配合有問題？佢地需要認真搵出原因，否則4年後阿根廷將繼續只會以鬆散嘅表現征戰卡塔爾世界盃。

不過，阿根廷傳奇球員甘巴斯就直言，美斯宜家應該退出國家隊兩年，因為目前球隊實在太依賴佢，當美斯都踢唔出表現，咁其他球員就更加毫無起色，目前根本無人能夠喺無美斯之下扛起球隊。

另外，甘巴斯亦都覺得，阿根廷係時候進行大換血，培養新嘅一批球員為未來征戰，而更重要嘅係要培養佢地嘅團隊意識，否則就算佢地喺球會踢到曉飛，番到國家隊都只係一盤散沙，完全無作為。

四年後，美斯將會35歲，屆時佢仲有無足夠能力去撐起阿根廷都係一個問題，所以為左未來阿根廷如今一定要求變，否則未來嘅路只會更加難行。而今屆無乜機會上陣嘅戴巴拿絕對可以成為阿根廷未來圍繞打造球隊嘅新核心，如今嘅佢只有24歲，4年後28歲將會係佢球員巔峰期，但當然其他位置嘅球員都一定要悉心打造，否則情況只會再次出現。