近日足壇如果要有一個消息比世界盃更震撼嘅，相信就係皇馬射手C朗拿度正式宣佈離開銀河艦隊，轉投意甲班霸祖雲達斯，並且其轉會費高達1億歐元！

33歲嘅C朗今次轉會祖記，可以話創下唔少球壇紀錄，其中包括轉會費係30歲以上球員歷史新高，另外亦都創下意甲有史以黎球員最高轉會費嘅紀錄。

而祖記為C朗開出嘅合同長達4年，年薪達到3000萬歐元，亦即係週薪超過57萬歐元！對於一位生涯已經可能開始走下坡嘅球員，祖記呢次投資係咪真係值得呢？

C朗2009年以8000萬歐元由曼聯轉投皇馬，相隔9年之後相信無咩人相信佢可以以超過1億歐元再轉會的。不過，C朗本身呢個品牌已經價值連城，佢除左能夠提升祖雲達斯整體嘅球隊價值，亦都可以大大改善近年非常低迷嘅意甲形象。直接嘅反應就係，祖記嘅股票呢幾日已經升左超過20％，帳面令球隊獲利超過1.6億歐元！

作為五屆金球獎得主，C朗拿度過去9年喺皇馬一共上陣438場，攻入450球，助攻131次，而其中西甲上陣292場攻入311球，交出95次助攻，歐聯則上陣101場攻入105球，交出31次助攻，基本上佢喺重要嘅賽事都可以交出極高效率，場均攻入1球以上實在係非常恐佈。

近年雖然C朗嘅速度已經大不如前，但係佢卻被改造成禁區殺手，其門前把握力絕對係目前足壇數一數二的。所以，預計本身喺意甲已經接近無敵嘅祖記得到C朗後將擁有更大優勢，入球應該源源不絕，更重要嘅係C朗喺歐戰嘅表現將可能令祖記擁有奪得冠軍嘅本錢！