人稱「格鬥狂人」嘅徐曉冬，近年不斷挑戰唔同門派嘅武術師傅，以證明對方喺現代已經唔實用，只係用黎「呃飯食」，最終佢亦真係多番KO對手，無論詠春、太極等都好似真係完全唔係佢對手。不過，近日佢再次接受搏擊拳手嘅挑戰，結果卻意外地被對方打穿頭，並需要縫上多針。

從影片入面可以睇到，徐曉冬基本上全程只有捱打，對方不斷以膝撞及快速直拳攻擊徐曉冬，後者則只係用雙手護頭，毫無還擊之力，甚至一度被打至倒地。之後徐曉冬雖然成功爬番起身，但係對方嘅膝撞攻擊持續不斷，最終徐曉冬終於捱唔住停止對戰，並發現原來佢嘅頭部已經受傷流血。

經檢查後，徐曉冬右眼眉上方被對方踢爆左，由於傷口過大需要縫上26針，並且一係雙層縫鋒，就係裡面需要先縫上6針，真係非常恐佈。

睇見徐曉冬全程被打，有人認為呢個就係「格鬥狂人」嘅真面目，就係面對職業拳手嘅時候就原形畢露，毫無還擊之力。不過，有消息指其實呢次只係徐曉冬嘅一次實驗，其實喺佢被呢位拳手踢爆頭之前，佢已經連續對戰左3位拳手，每次3分鐘，而佢只係全程防守，佢想睇下自己以38歲之齡可以有幾耐打。

如果消息屬實，徐曉冬真係連續對戰4位拳手嘅話，以佢咁嘅年齡再加上佢只係業餘拳手，佢嘅防守能力已經算係非常出色了。