【影音人物故事】音響界超級天才Michael Børresen自組Børresen Audio喇叭全新品牌

今日來介紹一位音響界奇人設計師丹麥的Michael Børresen，佢剛剛建立新喇叭品牌Børresen Audio

Michael Børresen 係音響界無人不識的超級天才，來自丹麥的米高世間罕有，一個成功的音響設師可以設計出非同凡響出類拔萃的產品，咁一個成功的天才可以做咩？就係一個人設計出擴音機，線材同喇叭同配件等好多好多唔同的東西。除左訊源呢個癲佬未開發外，幾乎所有音響範疇都見到佢的出品，八足咁多爪，仲要的係件件產品都高端highend，最新消息佢自立門戶建Børresen Audio喇叭新品牌。而家Michael Børresen手下有Aavik(擴音機品牌) Ansuz (線材及配件品牌)兩大音響品牌，連埋新作Børresen Audio 可以用哂佢全套的出品，不過首先你要有…………..

關於Michael Børresen

佢係天才無容置疑，而且膽色過人，敢於挑戰傳統，在剛建立Børresen Audio之前，已有四個知名音響牌子全部都係佢設計出來，包括有德國喇叭大廠Raidho及Scansonic，及自立的丹麥品牌Aavik擴音機及Ansuz線材，一個人做出咁多唔同的精品絕對稱得上是全能的音響設計師。

Michael Børresen成長係一個工具店家庭(即外國五金鋪！)，爸爸賣工具，自小在家就有各種各樣工具和五金等比佢自己創作同玩。Michael Børresen自細就熱愛音樂，迷上音樂好自然也迷上音響，尤其愛整機搞機，自己動手做喇叭(佢講出來好像好簡單！) 大學時讀的是機械工程，專攻材料和震動處理研究，也因此打好音響設計的基礎。畢業之後，米高第一份工係從事電話通訊公司的工程部門，負責衛星電話和無線電通訊的相關工作，據佢自述話正是呢方面工作的技術同經驗為佢後來的大爆發得著好多本錢,之後的故事就是音響迷最愛聽，米高開始自己設計喇叭開公司，成就出聞名歐外的Raidho 喇叭，

自我研發單元

Raidho 喇叭一點一滴都係佢自己設計，自己落手造，米高認為落手落腳才是真正highend，佢講過一架車最關鍵的地方就在於它的引擎，喇叭的靈魂則在於單元。無論你的箱體設計得再好、分音器再優秀，一切都比不上喇叭單元，設計喇叭必須從單元的設計開始思考。唔可以靠其他人，故此米高的喇叭是不會買其他人的單元組裝，全部自己研發。生產純人手製作之Hi-End喇叭成品。佢就係憑Ceramix「氧化鋁陶瓷」、Diamond「鑽石」中音與低音，以及密封式鋁帶高音等自家製單元，名揚Hi-End界

當Raidho喇叭站穩陣腳成名之後，Michael並無停下來，先是將Raidho的部份頂級技術下放到Michael另一個較親民的品牌Scansonic身上。­­音響裡面Scansonic呢個品牌就係平價版本的Raidho喇叭。

米高自有佢自己對音響的哲學，於是2013年時佢創立Hi-End級的發燒線材及配件牌子Ansuz Acoustics，之後再接再勵向Hi-End級擴音機進發，成立Aavik Acoustics(主力製造擴音機)。Aavik係一間好有趣的廠，其中一理念是一體化，全部野all in one一部機但又超級好聲，而且用發燒友最怕的D類放大制作，可見佢絕不因循守舊，極有冒險精神且精通音響最新的需要同發展。

2017年米高離開喇叭廠Raidho，在17年尾，米高就建立左Børresen Audio的facebook，正式自立喇叭品牌門戶，不過佢地未有任何正式的發佈，只係最新發佈左新喇叭的照片，而相信更多的消息同發佈要等到十月份RMAF: 北美丹佛洛磯山脈音響展，到時就會有喇叭的首次發佈同公開更多詳情

大家一起期待一下音響界走在最前的設計最新的設計係點樣樣！？