籃板球雖然喺漫畫《男兒當入樽》呢套神作入面被譽為能夠控制比賽嘅重要武器，而主角櫻木花道亦真係透過籃板球多次拯救湘北隊，但現實中籃板球雖然重要，但都只能夠算係Dirty Job，得分始終係皇道，特別係現今世代嘅球壇中。

不過，當一位球員可能只係擁有搶籃板球嘅天賦，但若果將佢發揮到極致，咁樣你都絕對可以被評為一名天才，而呢個人Dennis Rodman絕對當之無愧。

相信大家都聽過唔少人讚賞Rodman嘅籃板球功夫，又睇過佢搶籃板球嘅英姿，但究竟佢係強到咩地方，而佢搶籃板又有咩特別嘅地方呢？係咪只係彈力夠、搶點準呢？

先睇數據，Rodman喺1992-93球季開始連續7季榮登NBA常規賽籃板王，其中喺1992-93球季場均可以搶到18.7個籃板，領先第2位嘅Kevin Willis 3.2個籃板，並且順利壓倒Mutombo、David Robinson、Olajuwon等一眾著名中鋒。要知道Rodman身高只有6呎7吋，與一眾至少7呎嘅中鋒身高嚴重處於劣勢，但係佢就係可以喺呢班高人中一支獨秀，盡攬籃板球。

另外以下再配上其他數據助證佢嘅籃板球能力：

進攻籃板率：7個賽季中排名第一，職業生涯NBA第一
防守籃板率：7個賽季中排名第一，職業生涯NBA第一
總籃板率：8個賽季中排名第一， 職業生涯NBA第一

既然Rodman身高毫無優勢，咁佢一定有啲個人之處黎彌補佢呢部份嘅短板，但係究竟佢係點樣搶到咁多籃板球嘅呢？

「我地開始熱身及投射嘅時候，Rodman就企喺後面睇住大家投。我就同佢講 ‘Hey，過黎一齊熱身，大家都在熱身，你都要過黎上籃。’然後佢就話 ‘我正在觀察每個人投射時籃球嘅旋轉。’我就話‘咩意思？’佢話 ‘舉個例子，你出手之後球會喺空中轉三個圈，Joe Dumars嘅投射球有時候會轉三圈半或四圈。’」

「呢個就係Rodman點解可以搶到咁多籃板嘅關鍵，佢完全處於唔同層次。佢知道我地球隊每個人嘅投射情況，如果個波咁樣轉，佢就會知道個波彈去邊，彈左彈右邊面多啲佢完全掌握到。佢已經將籃板球變成一門科學，而其後我從來無聽過任何人講籃板球或防守可以達到佢嘅級別。」

「如果你講到籃球智商嘅話，Rodman絕對係一名天才。」

相信如果就咁問一定唔會有好多人會覺得Rodman係一名天才，但係如果曾經同Rodman做過隊友，又或成為佢嘅對手，你都一定會好驚訝佢點解可以預判籃板球準到咁嘅地步。

可惜嘅係，能夠達到Rodman級別嘅籃板球好手再無出現過，所以話NBA歷史最強嘅籃板王絕對係Rodman，佢嘅技術並唔係單純以籃板數字就可以反映，佢係將籃板球呢項技術鑽研至極致，甚至達到藝術水平，所以稱佢為搶籃板球博士都絕對岩數。