「呂布」伊巴謙莫域作為世界級前鋒，實力絕對係獲得一致肯定，因此佢經常自信滿滿語出驚人，霸氣外露，令人覺得佢好似做咩都掂，即使已經36歲轉戰美職聯仍然可以入球停不了。不過，最強之人都有失威嘅時候，伊巴謙莫域早前創立嘅時裝品牌「A-Z」因嚴重虧損，近日決定停止生產。

2016年嘅時候，伊巴謙莫域雄心滿滿咁建立起自己嘅「A-Z」服裝品牌，但由於生產成本過高，至今品牌已經虧損近2000萬歐元，所以品牌被迫宣佈腰斬止蝕。

其實，喺2017年「A-Z」係有穩定嘅增長，但始終礙於成本問題，品牌難以繼續落去。雖然係咁，「A-Z」指佢地係想每個人都可以接觸體育運動，由開始到結束，佢地係一個過程。

如今「A-Z」已經結束，事實證明唔係所有體育巨星都懂得建立自己嘅品牌，最成功嘅相信必定係NBA歷史巨星「籃球之神」Michael Jordan同Nike聯手合辦嘅Air Jordan，另外仲有C朗拿度嘅「CR7」品牌。

事實上，伊巴謙莫域喺球員生涯單單人工已經賺取超過1億鎊，亦即係1.12億歐元，所以就算佢今次損失2000萬歐元，亦都唔算非常嚴重，但係相信將會大大影響「呂布」未來再想創業嘅諗法了。