《涼宮春日的憂鬱》係日本作家谷川流所創作嘅輕小說《涼宮春日的物語》系列中第一部作品，由伊東雜音擔任小說插畫，並於2003年7月6日開始由角川Sneaker文庫發行。因為《涼宮春日的憂鬱》實在太受歡迎，所以後來被改編為電視動畫、漫畫、遊戲、電影動畫等等。而《涼宮春日的憂鬱》內容主要係講述以涼宮春日為中心嘅SOS團及成員嘅冒險故事。雖然作品非常受歡迎，但隨著作者谷川流無愈來愈冇感覺寫落去，故事亦都遭到停刊。可能本身粉絲以為再冇機會可以睇到《涼宮春日的憂鬱》嘅新作，但天無絕人之路，時隔5年，谷川流再有新消息，就係公布會為《涼宮春日的憂鬱》帶來新作，並名為《七不思議オーバータイム》（七不思議Overtime）！兼且要刊登喺2011年已休刊嘅輕小說雜誌《The Sneaker》上，成件事真係不可思議喇！

角川Sneaker文庫早排就宣布，《涼宮春日的憂鬱》將會喺10月31日發表原稿120頁嘅短篇新作《七不思議Overtime》，並刊載於輕小說雜誌《The Sneaker》上！雖然《The Sneaker》一早喺2011年宣布休刊，但為咗紀念Sneaker文庫30週年，所以角川Sneaker文庫今次特登畀《The Sneaker》限定復活一期！過咗就冇架喇！

而呢期限定復活版嘅《The Sneaker》除咗會刊登《涼宮春日的憂鬱》以外，仲會有《羅德斯島戰記》同埋《為美好的世界獻上祝福》特輯，認真令人期待呀！