{ SKIP }
文:MenClub 波特先生  圖:MenClub
POSTED ON 23 Nov 2018

相信唔少打工仔日日都面臨OT嘅考驗,想留少少時間比自己打下機、拍下拖好似都困難重重,更唔好話有空間去行可能需要花你幾個鐘嘅山。咁又想行山又唔想用咁多時間,點好呢?嘉頓山絕對係一個非常好嘅選擇。

嘉頓山,原名叫喃嘸山,又或者可以叫佢水庫山或煙墩山,其高度只有90.6公尺,屬於小山,所以就算你行到上山頂亦都唔會有好離地嘅感覺。由於其附近有嘉頓面包廠,所以唔少人都為左方便叫左佢做嘉頓山,令人更容易記。

網上有唔少人都介紹過嘉頓山,但大部份都係教大家行深水埗「黃金」出口,而今次我地MenClub就教大家行另一個出口深水埗B2出口。

B2出口一出,正對住嘅就係北河街,亦都係香港傳統排檔,基本上咩都有得買,價錢亦都比旺角女人街應該更相宜。一路源住北河街直行,就會見到一條行人隧道,穿過隧道可以見到左手面有一間舊式面包舖「均香餅家」,呢間面包舖喺深水埗都可以話相當有名,如果你想可以喺上山前買啲乾糧一路行一路食。

買完餅出番巴域街,你就可以見到不遠處有一座橙白色嘅建築物,佢就係已經成為青年旅舍嘅美荷樓啦。而去到美荷樓附近,你就要小心留意上山嘅位置,有一個寫住「晨運徑」嘅指示牌,跟住指示向前行就係嘉頓山嘅山腳啦。

大家去到山腳,就可以慢慢源住樓梯往上走,而深水埗嘅景色亦都會隨住你越黎越高,慢慢展現喺你眼前。

如果唔計你上山中途停低影相,基本上上到山頂都唔使15分鐘,而整個深水埗以至石硤尾都盡收眼簾,大家可以慢慢感受一下大地在我腳下!而如果你較岩時間,仲有機會睇到日落添!

而較為令人失望嘅係,以往能夠通過去水庫頂草地嘅路已經被圍封,大家都唔可以再過去野餐了。

記住落山一定要小心,特別係夜晚山上並無街燈,所以危險性大增。

Christopher Nolan嘅下一部大作《Odyssey》星光熠熠,單單係Matt Damon、Tom Holland、Anne Hathaway、Zendaya等演員名單就已經夠吸引大家入場。但除咗電影公佈嘅首張劇照確認Matt Damon會出演主角奧德修斯(Odysseu ...
hobby
【影視】Nolan《Odyssey》角色名單曝露 荷蘭仔、麥迪文演父子 Zendaya飾雅典娜
17 Mar 2025
Amazon及MGM早前從Eon Productions手上買下《James Bond》系列創作權之後,唔少人都擔心呢個代表英國嘅著名IP會被為利是圖嘅大企業玩爛,又或者被強行「覺醒」,特別係Amazon早前推出嘅《Power of Rings》更可謂前車 ...
hobby
【影視】Amazon指新James Bond仍是英藉、男性 Idris Elba接任有望?
17 Mar 2025