車路士中場簡迪，可以話係現今球壇最出色嘅防守中場，佢嘅防守覆蓋面誇張得被形容為海洋一樣，而喺佢嘅協助下法國隊成功奪得今年世界盃冠軍，李斯特城及車路士則成功奪得英超冠軍。雖然已經名成利就，但係簡迪並無恃寵生驕，甚至可以話已經成為球壇內嘅一道清泉！

作為足球壇嘅球星，每一位都身價不菲，收入非常人所能相比，而擁有巨額收入嘅佢地，球場上可能繼續發光發熱，但球場下卻可能縱情聲色，肆意豪花金錢，又利用灰色地帶逃稅等。而《足球解密》網站就經常搵出球星嘅秘密，發掘佢地背後嘅黑暗面比球迷們知道。

而一向給人謙遜感覺嘅簡迪當然唔會被《足球解密》放過，不過經過調查後發現，簡迪真係場上場下都係同一種人，實在令人相當佩服。

據消息指，當日簡迪簽約車路士嘅時候，球隊建議佢通過離岸公司收取部份人工及肖像權收入，因為咁樣將可以為佢減少87萬鎊嘅稅務支出。面對呢個建議簡迪經過深思熟慮後決定唔咁做，即使車路士工作人員不斷遊說佢。

簡迪回覆車路士嘅建議表示，佢只想收取工常的人工，並擔心稅務部門對呢類型灰色地帶進行進行處罰。

簡迪已經唔係一次被讚賞其人品，雖然佢週薪達到12萬鎊，但係佢並未好似其他球星咁豪花，好似佢嘅座駕仍然係效力李斯特城時購買嘅Mini Cooper。而又有一次佢被球迷邀請到其家作客，佢竟然一口答應，並喺球迷家中食飯及打機，認真一點架子都沒有。

而喺法國奪得世界盃冠軍之後，個個球員都爭相拎冠軍獎盃影相，而簡迪唔知係怕羞定想等隊友影相先，佢一直只係企喺旁邊等待，係直到其隊友尼桑斯見狀幫佢拎個獎盃，佢先有機會同獎盃影相。

對於簡迪呢種球員，真係令人愛不釋手，佢從來唔會覺得自己係球星，就算係靠佢贏波，佢都會覺得係全靠所有人嘅配合，如今已經被利慾薰心嘅足球壇仍然能夠有呢一道清泉，真係難能可貴！