76人近年成功囤積一班極具天賦嘅年輕球員，其中好似Joel Embiid及Ben Simmons，一個被譽為「大夢」嘅接班人，一個就被評為另一個LeBron James。單係擁有呢兩位球員，76人基本上未來10年都唔使擔心，更何況佢地之外再憑住交易換黎另一支狀元籤，並成功選得在大學已經展現天賦嘅控衛Markelle Fultz。

不過唔知係咪因為個天對76人囤積天賦嘅行為睇唔過眼，佢地嘅高順位新秀都要先經歷大傷，講緊嘅係輕則新秀賽季報銷，重則連續兩個賽季都需要長時間休戰。就好似Embiid，佢2014年加入NBA，但直至2016-17球季先正式上陣；Simmons就新秀賽季未上一場就報銷。如今到Fultz，上季佢只係短短上陣過17場比賽，而黎到今季雖然至今已經上陣了19場比賽，但最新的消息指呢位控衛將因為肩膊問題，其團隊突然要求他離隊尋醫。

Fultz嘅問題其實都已經非常明顯，就係易普症，亦即係所謂嘅投籃失憶症，患者會忘記如何混用肌肉控制投籃，所以你會睇到Fultz嘅投籃姿勢非常奇怪，更甚嘅係會出現不由自主嘅抽搐。

對於呢個情況，Fultz本身已經喺今年夏天搵左一位投籃訓練師進行特訓，並傳出佢進行左15萬次嘅投籃，所以投籃姿勢已經大有改善。不過好景不常，Fultz與訓練師發生不和，最終不歡而散，Fultz嘅投籃問題再次出現喺球迷眼前。

面對難以解決嘅情況，Fultz嘅團隊決定一定要斷尾，所以要求Fultz放低比賽及訓練專心進行治療，並為佢搵黎一名肩膊嘅專家幫佢診治。

對於自己嘅情況，Fultz認為自己無咩問題，信心仲好夠，但現實同數據卻顯示Fultz嘅表現絕對唔能夠令人滿意。今季19場比賽，Fultz場均上陣22.5分鐘，只能夠取得8.2分3.7籃板3.1助攻，投射命中率為41.9%，三分球命中率則只有28.6%，罰球亦都只係有56.8%。

再加上76人如今已經獲得Jimmy Butler，Fultz獲得嘅球權進一步變少，既然係咁盡早解決自身問題可能真係最好嘅做法。最終Fultz真係能夠回後大學時期嘅狀態，咁樣76人嘅實力將可以更進一步！