之前MenClub都同大家介紹過，日本打算於2022年改建日本愛知縣嘅「愛・地球博記念公園」，變成「吉卜力公園」，仲公開咗「吉卜力公園」嘅內容係點。而最近愛知縣又公佈咗最新計畫報告書，除咗各區嘅規劃有更詳盡嘅介紹之外，各區嘅開幕時程都定好咗，相信最快2022年就可以見到半個「吉卜力公園」。

園區規劃大致上同之前公佈嘅一樣，都係分為五大區，分別係「青春の丘エリア」、「ジブリの大倉庫エリア」、「もののけの里エリア」、「魔女の谷エリア」同埋「どんどこ森エリア」，只有區域形狀稍作改變

1.「青春の丘エリア」
原本嘅管理大樓將會變成「青春の丘エリア」，以19世紀末科學要素為主題。

2.「ジブリの大倉庫エリア」
原本嘅溫水泳池會變成「吉卜力大倉庫」，會展示各種吉卜力畫作、影片，另外仲有小賣店同飲食店。

3.「もののけの里エリア」
「もののけの里エリア」會設計成《幽靈公主》嘅風格，以大自然為主題。

4.「魔女の谷エリア」
「魔女の谷エリア」以「魔女宅急便」同埋「哈爾移動城堡」為主題，變成全北歐風格。

5.「どんどこ森エリア」
「どんどこ森エリア」會變成龍貓之家，附近嘅森林都會變成散步小道！

而根據官方嘅時程表，「青春の丘エリア」、「ジブリの大倉庫エリア」同埋「どんどこ森エリア」將會喺2022年提前開幕，至於另外兩個區域，就大約一年之後再開。

不過最令粉絲失望嘅係，吉卜力有大半作品都冇納入公園入面，而當中以《千與千尋》嘅呼聲最高。另外唔少人都覺得，「吉卜力公園」規模太細，同想像中有出入，令人感到可惜，唔知香港嘅巴打又點諗呢？