全場精華

歐聯戰火再開，其中曼聯主場迎戰巴黎聖日耳門一戰可以話係焦點所在，但賽前PSG方面有尼馬及卡雲尼因傷缺陣，令自從蘇斯克查上任後氣勢如虹嘅曼聯被睇高一線。但事實PSG又係咪無晒攻力呢？答案好明顯唔係，因為佢地仲有麥巴比！

無左尼馬同卡雲尼，PSG今場排出一個4-2-3-1嘅陣容，箭頭只係擺出麥巴比一人，理論上曼聯防守變得更清晰，就係全場緊盯麥巴比，但係呢位超級天才又點會咁容易就範呢？

麥巴比憑住無人能敵嘅速度全場奔走，令曼聯後防疲於奔命，要不是門前有個迪基亞，曼聯可能早早失球。不過，迪基亞最終都係無阻PSG贏波，麥巴比個人先係為球隊博得一個角球，然後由迪馬利亞助攻甘佩比近門射入，為球隊先開紀錄。

第二個入球，則完美體現麥巴比恐佈嘅速度及爆發力。首先，迪馬利亞喺左路得球，呢個時候麥巴比開啟全速模式突入禁區，迪馬利亞地波傳中，麥巴比波到人到輕輕一撞就成功破網。

除左為球隊製造入球之外，麥巴比一人亦令曼聯三位球員領上黃牌，可以見到即使曼聯已經重點招呼佢，但都完全無佢乎，仲要犯規先可以阻止到佢。

而憑住以上兩個入球，PSG成功作客帶住兩球回到主場，下場將擁有極大優勢，晉級8強指日可待。

喺無尼馬同卡雲尼嘅情況下，麥巴比今仗獲得一個更大嘅舞台，佢可以毫無保留咁發揮，佢係今場嘅主角，當美斯及C朗拿度開始走下坡嘅時候，相信就係真真正正屬於麥巴比嘅時代。