上場聯賽盃決賽，車路士唔單只在互射12碼不敵曼城外，加時最後階段門將Kepa唔聽教練沙利指示拒絕被換引起巨大迥響。而喺尋晚與熱刺嘅比賽，沙利就決定將Kepa雪起，起用後備門將卡巴尼路。

最終車路士憑住柏度及對方送大禮，以2:0擊敗熱刺，喺爭四之路上佔據優勢。而另一個焦點係，沙利真係決定將上仗拒絕被換嘅Kepa放喺後備席上。沙利表示：「落呢個決定(雪Kepa)非常容易，因為佢犯左一個巨大嘅錯誤，他與球隊都需要付出代價，而佢亦都要向球隊作出交代。」

而成功取代Kepa成為車路士正選門將嘅卡巴尼路成功零封熱刺，亦都足以證明自己嘅實力。有消息指，當日不敵曼城後Kepa在更衣室與卡巴尼路曾發生爭執，並表示自己比對方更出色，所以不願意被換下場。如今卡巴尼路證明自己亦都有實力為車路士鎮守大門，可以話係吐氣揚眉。

一場零封，足以令Kepa明白自己雖然身價達到8000萬歐元，但佢亦都需要用實力去證明自己，其位置並唔係100％穩的。而卡巴尼路其實亦心裡有數，車路士嘅正選會係Kepa，而佢自己只可以等待機會，但呢一種咪就係作為職業球員應有嘅態度囉，Kepa都真係要學習一下了。