桌球界現時世界一哥係擁有最多Fans嘅傳奇球手「火箭」奧蘇利雲，佢手握多個歷史紀錄，其中包括36個排名賽冠軍、15次打出滿分147、最快完成147、1008次Century Break等等，所以喺唔少人心目中佢已經係歷史最強嘅桌球手。

而對於歷史最強桌球手嘅寶座，有唔少人認為除左奧蘇利雲之外，七次奪得桌球世錦賽冠軍嘅「桌球皇帝」亨特利係最有機會壓過「火箭」嘅人選。不過，「火箭」近日發表了自己嘅睇法，佢直言自己絕對係歷史最強，甚至稱自己與美斯一樣。

「對於我與亨特利邊個先係歷史最強桌球手，呢個話題一直爭議不斷。」

「亨特利曾7次奪得世錦賽冠軍，而我只有兩個，但其他賽事我嘅冠軍數都比佢多。呢個情況就好似美斯未曾贏過世界盃，佢就唔係歷史最偉大球員一樣。喺我嘅角度美斯就係最偉大嘅足球員，馬勒當拿、施丹、朗拿度等球員都比唔上佢，佢的確未贏過世界盃，但咁樣係唔會改變我嘅睇法。」

「我很難去滿足所有人，除左7次世錦賽冠軍之外，我一直去創造所有紀錄、並以攻擊性及華麗嘅打法去完成賽事。」

「要以呢種打法去獲得成績並唔容易，但我對於自己的職業生涯都感到滿意。每一個球季都會有球員打出好成績，而我慶幸每一季自己都有份，每一季自己都可以喺最高水平保持穩定性。」

確實奧蘇利雲喺桌球界最重要嘅賽事世錦賽中「只有」5次冠軍，比亨特利少上兩次，但綜合所有賽事及紀錄，奧蘇利雲嘅成就確實已經超越亨特利，而「火箭」同時亦暫退出球壇，所以佢仍然有機會追平甚至超過亨特利世錦賽嘅紀錄，屆時歷史最偉大嘅桌球手將會變得更加毫無質疑嘅空間。

不過，今屆世錦賽首圈，「火箭」似乎已經遇上麻煩，佢雖然面對嘅對手係世錦賽歷史首位業餘球手James Cahill，但第一日嘅比賽「火箭」竟然暫以4:5落後，實在係一個不少嘅冷門。當然，雙方仲有第二日嘅比賽，「火箭」仍然有逆轉嘅機會的。