《鬼太郎》呢部經典作品踏入50周年，近期係咁推出各式各樣嘅周邊商品，不過其中一樣商品有趣歸有趣，但對香港人嚟講真係唔知幾時用得著，佢就係載住鬼太郎周圍飛嘅「一反木綿」……兜襠布！

由BANDAI出品嘅「一反木綿」兜襠布靈感來源自然係來自「一反木綿」，話說「一反木綿」係日本傳說中嘅妖怪，「一反」中嘅「反」係日本面積單位，以長度而言「一反」大約有11米。而「木綿」即係棉花，呢度指嘅係以綿花製作嘅布料。喺《鬼太郎》入面，「一反木綿」嘅形象就係一塊有靈體嘅長形綿白布，而佢平時會載住鬼太郎周圍飛嚟飛去。

而呢次嘅商品就係以「一反木綿」為主題整成嘅兜襠布，圍上下體加上有風吹起時，白布就會飄飄下，變成生動嘅妖怪「一反木綿」！

呢個Idea係就係好有趣，但……有幾多人真係用得著佢呢？！