今年世界女排聯賽香港站將於今年6月4-6號喺紅館舉行，除左一如以往有中國隊之外，今年仲有意大利、日本以及荷蘭隊。而喺香港站舉行前，澳門站率先喺澳門綜藝館展開，參加隊伍分別有中國、比利時、泰國及韓國，而最終中國隊三戰全勝成為今站贏家。

一連三日喺澳門舉行嘅世界女排聯賽澳門站，中國隊表現非常出色，三場賽事都係不失一盤，以直落三盤贏晒另外三支隊伍，以全勝姿態結束今個分站。

憑住全勝嘅戰績，中國隊亦成功奪得由銀河娛樂集團主辦嘅「銀河娛樂之星─我最喜愛的隊伍」，而陣中最受歡迎嘅主將朱婷則奪得「我最喜愛的球員」，而其表現亦絕對當之無愧。

澳門站完結，中國隊將馬不停蹄去到香港進行香港站嘅賽事，屆時各位香港球迷又可以近距離見到一眾世界最頂級嘅女排選手獻技。