利物浦相隔14年後再一次奪得歐聯冠軍，一眾球迷及球員相信仍然沉醉於奪冠嘅快樂當中。不過喺仍然屬於慶祝嘅期間，利物浦領隊高普卻宣佈，前鋒史杜列治及左閘摩蘭奴將於今夏約滿離隊。

領隊高普對外公佈，史杜列治及摩蘭奴今夏與利物浦嘅合同將會到期，而二人將不會和球隊續約，因此今夏二人將會一同離開。

29歲嘅史杜列治作為曼城嘅青訓，2009年轉投車路士，再於2013年以1200萬鎊轉投利物浦，效力紅軍期間一共上陣160場賽事攻入67球。

而26歲嘅摩蘭奴則於2014年由西維爾同樣以1200萬鎊轉投利物浦，效力5季期間一共上陣141場攻入3球。相比史杜列治，摩蘭奴喺利物浦嘅作用今季黎到歷史新低，今季呢位左閘一共只係上陣5場賽事，因此其離隊絕對是合理的。

雖然作為利物浦今季奪得歐聯冠軍嘅一員，但事實上史杜列治及摩蘭奴喺歐聯決賽中均沒有上陣。不過對於即將離隊嘅兩位球員，高普卻盛讚二人為「非凡的球員」，並多謝他們為球隊嘅付出。其中對於史杜列治，雖然高普唔知佢嘅下一站喺邊，但卻肯定其實力。