一直以帝王形象示人嘅「呂布」伊巴謙莫域，自從加盟美職聯之後表現仍然相當出色，經常有不少精彩入球送比一眾球迷，而佢本人亦深信自己絕對係美職聯嘅最佳球員。不過，近日外界卻有指效力FC洛杉磯嘅卡路士韋拿比伊巴謙更出色，你估「呂布」又會點回應？

目前37歲嘅伊巴謙為洛杉磯銀河攻入16球及交出3次助攻，但球隊卻只能夠排在第2位，相反卡路士韋拿已經攻入21球並交出12次助攻，而其球隊亦高據榜首，所以客觀咁睇卡路士韋拿嘅表現確實要比伊巴更好。

不過自信心爆棚嘅伊巴謙又點會願意比人騎住，佢回應韋拿比自己更出色嘅言論表示：「佢(韋拿)而家30歲正值巔峰，但佢效力嘅係美職聯。而我30歲嘅時候，我喺歐洲效力，差距極大。」

伊巴謙嘅回應該又確實不無道理，30歲嘅佢當時正效力AC米蘭，並岩岩為球隊贏得意甲冠軍，程度上確實與韋拿差天共地。而現在已經37歲嘅伊巴狀態仍然處於世界級，以咁嘅年齡交出咁嘅表現實在令人佩服。

更重要嘅係，伊巴喺岩岩嘅星期六帶領洛杉磯銀河擊敗洛杉磯FC，其中伊巴個人更大演帽子戲法！