近呢幾個月，香港有一股「裝修」熱潮，而估唔到呢股「裝修熱」竟然由現實走到遊戲中！由獨立遊戲開發團隊The Knights of Unity打造嘅四人合作裝修遊戲《Tools up!》，今日正式登錄四大平台：Switch、PS4、Xbox One及PC。

相信唔少朋友都一定有玩過《Overcooked》呢隻Game，而《Tools up!》嘅玩法同《Overcooked》嘅玩法接近，同樣最多可以支持4人同時遊玩，但場地唔再係廚房，而係需要進行裝修嘅房間。

玩家將需要於不同嘅房間進行大翻身，於指定時間入面為房間油油、換牆紙、換地板、改變房間結構等等。另外，遊戲當中會有一名玩家手持裝修藍圖，並指揮其他玩家房間需要如何裝修，最終以達成任務要求。

當然，遊戲中間會有好多預計不到嘅情況，好似你會唔小心踢跌油漆罐，又或裝修出錯，令遊戲變得更加爆笑有趣！