上週英國布里斯托音響展好多英國音響迷睇到唔同英倫音響廠的新展示，所以近期英國野特別多，英國音響好有歷史但其實能夠堅持英國生產、英式設計真正英國喇叭甚少，過去熟悉的品牌紛紛淪陷。所以香港消費者其實好「醒」，能夠在香港市場常期保持熱賣留得住流芳名的都是「猛料」品牌，始終如一的英國ProAC就係當中佼佼者，上年ProAC展示Response D2R和K6 Signature喇叭，今年更為矚目因為發表展出的係旗下旗艦K系列--K1書架喇叭和座地頂級K10大座地喇叭，如果覺得純英國血統正統英倫唔會海外生產才是好喇叭，ProAC正正是你的選擇。

有人話ProAc就好似邪教一樣，一入教門就會成為「死忠」，即使日後唔用都會讚歎一世，老老實實，我從未入教只聽過幾次朋友家中的ProAC，聽覺英式確實美觀又吸引，由於今次ProAC推出的係旗艦級K系列，所以造工設計都係巧奪天工，有種好傳統又新穎的美感。「K」系列推出之前ProAC旗艦叫做Carbon Pro系列，當時首度應用碳纖維震膜製作低音單元，不過到了「K」系列，低音單元震膜材料升級成Kevlar，俗稱防彈布，與碳纖維的特性類似，具備高剛性、輕質量的物理特性。今日介紹全新的兩個型號整體同K系列無大變化只是廂體大細分別推出一對細書架同一個超大高身座地。

ProAC的K系列原本就有K3,K6同K8三款座地喇叭，所使用的單元同設計同今日兩款新型號一致，但今次就為細小家居和特大豪宅兩類用家補足選擇，推出的K10同K1正正將K系列引入實用的選擇當中，尤其K1喇叭，相信好多中過ProAc毒的香港地區玩家都會心猿意馬 。

先講ProAC K10外型霸氣身型高大極具吸引力，修長的反射式聲箱造型好正，不過我先數佢缺點高頭大馬設計同K系列一樣其實係無咩新驚喜，不過佢K系列本身就是一個平平實實但嚇死人的驚喜，K10喇叭使用啞鈴式單元佈局，合共使用2個別注生產的8吋Kelvar震盤低音，2個大口徑半球型饅頭中音和輕量化鋁帶單元高音，一眼就睇盡高貴氣派。

當然對香港發燒友來講，K10係外星級美女，不遇不可求送比你都未必玩得好，相反，大家目標都係另一個K系列新成員K1身上，書架係香港才是皇道，K1擁有二路分音設計，配合度身訂製專用腳架同台演出，其反射式聲箱所採用的呼吸管導設計，同另一個K6喇叭一樣。經典輕量化鋁帶高音搭載6吋半特製Kevlar震盤中/低音單元，好聲得來其實好易推動。提一提廠方的度身訂製專用腳架係喇叭設計一部份，呢件錢如果你真選擇K1喇叭，絕對唔慳得，買前要認清你買緊的係旗艦級系列，唔好「慳」一萬幾千，不然好多其他英式喇叭品牌中國製造慳有慳玩法。

如果我有錢，ProAC將會移入本官。不過通常講呢D的人都係只能買中階系列，我唔敢話推薦ProAc K1和K10喇叭，因為香港人好識玩，鬼唔知ProAc好咩？