依家大家想知一套戲好唔好睇，會上網睇下影評、會去評分網睇下分數、亦會上Youtube搵條Trailer黎睇下，但大家仲記唔記得以前大家係憑咩決定入唔入場睇一部戲？就係靠戲院門口張Poster！你話如果今時今日嘅戲都仲有呢啲Poster，又會係點嘅樣？日本畫師「醃牛肉太郎(コンビーフ太郎)」就可以答到你啦！

醃牛肉太郎以70年代日本電影海報風格，為近年嘅荷里活電影重新設計海報，除咗視覺上充滿年代感，當中亦有唔少懷舊細節。例如近年外國電影(尤其英語電影)進入日本市場時，電影名稱通常係直接使用片假名拼寫嘅英文名，但早年日本方面係會為電影重新命名，例如醃牛肉太郎就將《Gaurdian of The Galaxy》改成「銀河愚連隊」、《Aquaman》就變咗「大海的決戰」。

另外大家亦可以留意部份海報有「カラー作品」字樣，即係指呢套戲係有色電影，當年係賣點之一！