有陣時真係不得不佩服鳥山明老師，《龍珠》出咗幾廿年，單行本都出過兩次，但仍然都可以咁Hit。除咗年年新Game、近期又有新劇場版，最近東映仲賣埋個播映權去墨西哥添！

之但係賣去墨西哥關我哋咩事呢？就係因為專門出動漫主題服裝嘅墨西哥服裝品牌「Heredia Clothing」，出咗一套三款以「悟空」、「比達」和「杜拉格斯」做主題嘅鞋，著咗戰鬥力即刻上升！

悟空版有好大個「悟」字。

比達版就用上戰鬥鞋，再配上比達王族的族徽。

杜拉格斯版就最忠於原著(又或者話原本杜拉格斯對鞋最似真係有人著嘅款)，加上「膠囊企業」的大Logo。

售價每對400墨西哥比索(約210港元)，好似好抵咁呀可？但人家淨係寄墨西哥本土咋，所以如果想買，就要買埋機票啦！