上年「魂」嘅Metal Build其實就已經出過初號機同貳號機，由山下育人擔任造型，無論比例、細節、質感都同一般嘅EVA唔同，配件又齊，所以大受歡迎。但近日佢哋就突然宣佈推出一隻[EVA2020] 版，仲要6月就出貨，你以為只係新色？錯啦，今次佢哋實際上賣嘅，係碌朗基努斯之槍呀！

話說當日嗰隻初號機雖然樣樣都好，但就係冇連埋支朗基努斯之槍，咁Fans們當然就有啲不滿。而新出嘅[EVA2020]除咗機體全部換成金屬色塗裝、連個盒都用燙銀之外，同舊版最大嘅分別就係多咗碌透明金屬紅色，長39cm、用黎食飯都嫌佢大、長少少已經可以用黎BBQ嘅朗基努斯之槍，算係完咗Fans們嘅心願，上次買唔到嘅今次亦可以入手。但如果買咗上一隻嘅，又會唔會用多28,600 Yen (約HK$2,000)買多支朗基努斯之槍呢？