奉俊昊執導嘅《上流寄生族》橫掃世界各大電影頒獎典禮，片中幾乎每一個場景、每一句對白、甚至畫面上每一條柱都有人解構分析過背後嘅意義，講真已經去到會考中文閱讀理解問你「作者想講啲咩」嘅程度。咁實際上作者，即係呀奉俊昊導演又係點創作整套電影？呢本《Parasite: A Graphic Novel in Storyboards》硬皮書就話到你知啦。

顧名思義，呢本硬皮書其實係收集咗奉俊昊導演親手畫嘅《上流寄生族》Storyboard，當中包括電影中每一個場景、每一個鏡頭，再配上對白，另外亦有奉俊昊寫嘅序，同埋前期設計及拍攝佈景嘅照片，除咗令大家可以慢慢嗒真啲佢個故事，亦可以深入了解電影背後嘅創作過程。更重要係佢一啲都唔貴，Amazon只係賣緊27蚊美金，即係兩舊水港紙，無論你係真心想研究電影本身，定只係想買黎做個裝飾都一樣啱用！