戲院重開，相信唔少戲迷都好想快啲入場睇戲，問題係所有大作都因為疫情延期，唔計《數碼暴龍Last Evolution 絆》(因為你女朋友唔會放你去睇) 似乎又真係冇咩令你入場嘅好理由。放心，本港各大院線似乎都係咁認為，所以紛紛拎嘢啲經典電影出黎，唔知以為係道X星期日影院加明X930呀！

Warner Bros. 重推《黑夜之神》

Christopher Nolan嘅新作《Tenet》要等到7月先有得睇，之前嘅呢個空檔，發行商就決定重推Nolan執導、第一集距今已經15年嘅《Dark Knight》三部曲，順序於6月4日 (嗯？)、6月11日及6月18日重新上映，據報三集都會有IMAX版本。目前已知UA院線將會參與是次重映，未知其他院線會否跟進。

講開UA就順手講埋，UA早前推出「Showreel Film Pass」，將多套電影分成「鬥智鬥力」、「驚慄奇情」、「奇幻刺激」等7個系列，每個系列三至四套戲，但一個系列嘅Film Pass只需$150 (三套戲) 或$200 (四套戲)。其中比較吸引嘅有「飢餓遊戲系列」，即係一次過睇返哂四集《飢餓遊戲》。

另一邊廂，Broadway就接手圓方商場嘅戲院並命名為「PREMIERE ELEMENTS」，重開後亦會於CGS 4K激光巨幕影廳及THX原音聲效認證影廳，重新放映2015年電影《Mad Max: Fury Road》。唔鍾意動作片嘅你，亦可以選擇極富詩意嘅4K修復版《聲光伴我飛》(又稱《海上鋼琴師》)，或者韓國經典愛情喜劇…但後半段喊死我嘅《我的野蠻女友》。

要數到最有道X星期日影院味道嘅，就一定係嘉禾院線，事關佢哋推出「好想瘋狂睇港產片」系列，將會重映陳奕迅及張柏芝嘅經典港產愛情片《十二夜》，以及《最佳損友》、《最佳損友闖情關》等嘉禾經典，據知之後仲會有《風雲：雄霸天下》、《夏日的麼麼茶》同《東京攻略》等好戲重映。

外語片方面，佢哋亦推出「好想睇多次」系列，目前公佈有印度電影《起跑線》，《挑戰者一號》及兩套Tom Holland版《蜘蛛俠》。但不在此系列嘅仲有超巨幕版《Pulp Fiction》、《2001: A Space Odyssey》及《Good Will Hunting》，而且限定一場，爆哂乜滯架啦。

另外要提醒一下，雖然我知有戲睇大家好開心，但亦請務必循守各個院線嘅防疫措施，戴口罩呀、發燒冇得入場、隔住坐之類大家都識架啦，亦要注意部份院線目前禁止飲食，反正就睇得安全啦下！