我知未必個個都有睇開《League Of Legends》電競比賽，但大家對於北方某國嘅玻璃心行為一定相當感興趣，所以就同大家分享一下近日喺季中杯比賽發生嘅事啦。

圖為T1選手Canna短暫選出「圖奇」一刻。圖中人為效力T1的著名電競選手Faker

卻說近排係《LOL》電競嘅休賽期 (你當係足球歇冬期啦)，咁韓國聯賽「LCK」同中國聯賽「LPL」就搞咗個線上嘅「季中杯」，由雙方春季賽頭四名參加，日前舉行第一賽分組賽。其中一場比賽中，韓國春季賽冠軍，亦即係傳奇選手Faker效力嘅「T1」對上中國春季賽亞軍「TES」，雙方於選角色嘅時候，T1上路選手Canna選出一隻名為「圖奇 (Twitch)」嘅老鼠角色，雖然最後冇鎖定到，但就令到一班中國網友非常激動，又話對方辱華又話「拉仇恨」又憤怒又盛，更加直接攻擊Canna、T1以至整個韓國聯賽甚至韓國人，總之玻璃就碎到一地都係。

咁中國觀眾點解咁嬲呢，卻說由於文化不同，《LOL》嘅中國版角色名稱亦有所不同，「圖奇 (Twitch)」呢隻設定上係變種老鼠，啲招式都係同「毒」有關嘅角色，喺中國版個名係叫「瘟疫之源」，再加上由於「圖奇」目前而言並非強角，所以中國網民就理解對方選出「圖奇」只為侮辱中國為「瘟疫之源」。另外佢哋亦截圖著名選手Faker於事發時嘅一絲微笑、以及搵返當日Canna加盟T1前該隊教練講過「黎明將至」再引伸出「Canna行為代表整個隊伍」，將件事無限升級…係呀，佢哋個邏輯就係咁運作架啦。