每個男人，尤其當你玩過《人中之龍》，都會想親身去日本體驗一下陪酒女郎究竟咩一回事，但一來你冇呢個膽、二來你冇呢個錢，所以絕大部份人都係得個諗字。不過日本東京歌舞伎町有間接近50年歷史嘅陪酒店「愛．本店」，最近就開放咗入場費只需1000Yen嘅下午茶放題時段，係咪好想去呢？

「愛．本店」創立於1971年，至今將近50年歷史，亦係歌舞伎町區內歷央最悠久嘅牛郎店之一——呀係呀，牛郎店黎呀，我冇話你知咩？唔好走住，聽埋我講先啦——「愛．本店」將於6月尾搬去新地址，而用咗50年嘅舊址就將會拆毀。拆毀之前嘅呢段時間，佢哋就開放咗下晝2點到5點嘅下午茶時段，提供任飲嘅汽水、任食小食，更加歡迎男士，甚至小朋友入內參觀。

咁入到去好明顯就唔會做啲平時女客人入去會做嘅嘢，但你就可以親眼睇下啲牛郎係咩樣，仲可以仔細欣賞呢間由昭和時代開到依家嘅牛郎店內部裝飾，感受一下嗰種金碧輝煌同紙醉金迷嘅氣氛，仲可以自由拍照，你當去個博物館都抵啦！

不過，由於原址會於6月尾拆毀，所以身處香港嘅大家應該都冇機會親身去睇，唔緊要，咪睇相當去咗囉，大家平時睇女都係睇相當識咗架啦唔係咩？

Soranews24

aihonten on Instagram