Lego又係砌、Puzzel又係砌，兩樣嘢撈埋一齊唔係瀨尿牛丸？而係Lego最新推出嘅「Lego Art」系列！

所謂Lego Art，其實就係用Lego砌嘅馬賽克平面裝飾畫，亦即係一塊底板再加唔多顏色嘅粒粒，只要你再照住指示將啲顏色粒粒砌上塊板到，就可以得到一幅Lego馬賽克畫。目前推出嘅有Andy Warhol嘅瑪麗蓮夢露肖像、The Beatles肖像、Marvel Iron Man盔甲肖像、以及《Star Wars》Sith奸角肖像。

值得一提嘅係即使每個系列都有三到四款圖案，但其實只係同一堆配件嘅不同砌法，換言之你砌完睇到悶就可以用附送嘅工具，起返哂啲粒粒出黎，砌出同系列嘅第二款，亦代表如果你想儲齊成套，就要買多幾盒。另外Iron Man同Sith系列係可以用三盒加埋，砌出大幅啲嘅第四款，即係如果你想一次過放哂三小一大出黎，前前後後係要買六盒，每盒119.99美金，計落都唔算平架。

Iron Man及Sith系列集齊三盒就可以砌出第四款

圖片：Lego