要不是肺炎疫情，7月24日就係東京奧運開幕嘅日子，咁大家呢排好有可能去咗日本旅行，咁就唔使喺香港熬，而可以去東京熱！依家唔好講奧運，連日本都去唔到呀！自然亦都去唔到本身打算食住奧運條水開幕嘅新景點，例如位於日本埼玉縣嘅角川武藏野博物館 (角川武蔵野ミュージアム)咁，8月開幕，但大家唔知幾時先可以親身去啦。

圖片：角川武蔵野ミュージアム on Facebook

角川武藏野博物館位於日本埼玉縣所澤市，乃係當地城市規劃「所澤Sakura Town」中嘅一部份，睇個名就知道同日本著名出版社「角川集團」有關。建築本身係由日本建築大師、同時亦係今屆東京奧運主場館「國立競技場」設計師隈研吾所設計，外形係以2萬片花崗岩砌成嘅多邊5形，隨住日照會有不同程度反光，營造出無限變化。

圖片：角川武蔵野ミュージアム on Facebook

之於內在，就係一個集圖書館、美術館及博物館於一身嘅文化場地。樓高5層分別有漫畫、輕小說圖書館、咖啡廳、動漫博物館商店、以及最搶眼，樓高8米貫通四、五樓嘅「本棚劇場」，牆上書架總共收藏超過35萬本角川集團出版書物，亦好明顯係打卡熱門地點。

角川武藏野博物館將於8月1日正式開幕，7月15日開始網上售票。大家應該就去唔到架啦，唯有Mark低等疫情過咗先去啦！