來自新加坡嘅XM Studios早前推出一系列「DC Samurai Series」全身雕像，到上年再推出騎住隻馬、型到傻嘅「Batman Shogun」，然後剛過去嘅DC FanDome再接再勵，推出新款「Batman Shugo」之外，亦推出「Joker Orochi」！

圖片：XM STUDIOS

「Batman Shugo」保持「未來武士風」嘅特色，身上盔甲厚重而精細，線條借鑒日本武士盔甲，但細節及質感卻充滿未來科幻感，立於蝙蝠探射燈上拔刀嘅姿勢亦具逼力，盞探射燈本身亦極為精美，仲可以著燈同360度旋轉。值得留意嘅係產品有分Ver.A 及 Ver.B，其中Ver.A包括可更換頭盔及胸甲，左右手亦可以分別換上鉤索槍及飛鏢；而Ver.B 就係Ver.A所有嘢，再加上血紅頭盔頭雕、露臉頭雕、血紅胸甲，以及拔刀後右手武士力、左手脇差嘅手部更換部件。

圖片：XM STUDIOS

而「Joker Orochi」就係「傳統」白臉綠髮嘅小丑立於八岐大蛇之上，紫金配色嘅武者服及盔甲極為華麗，尤其係武士服襟內嘅金色花紋令人目不暇給。而小丑充滿邪氣嘅表情配上「舐刀」動作亦突顯角色性格。「Joker Orochi」同樣有Ver. A同Ver. B之分。Ver. A有右手持鎖鐮嘅手部更換部件，頭部亦可換成冇頭盔嘅奸笑；而Ver. B就係Ver.A再加「鬼面」頭雕，以及分別持小太刀與鐵筆 (鐵撬) 嘅兩件更換部件。

圖片：XM STUDIOS