唔知大家早排有冇入場去睇《The New Mutants》，呢套「20th Century Fox最後一部《X-Men》電影」有意成為史上第一部「心理驚慄超級英雄片」，但結果係點呢，大家去睇睇IMDB個評分就知。不過Fox做唔到嘅嘢，Marvel有可能做到，因為睇返最新公開嘅Marvel影集《WandaVision》嘅正式預告，似乎都係偏向心理驚慄喎！

Marvel於香港時間今朝突然發佈《WandaVision》嘅正式預告，預告一開始就見到Scarlet Witch (Elizabeth Olsen飾) 與「正常人樣」嘅Vision (Paul Bettany飾) 於美國舊電視肥皂劇風格嘅黑白畫面中跳舞，似乎係過住平凡而幸福嘅生活。但隨後與鄰居/朋友嘅一餐晚飯中，佢哋兩個卻講唔出究竟幾時結婚、之前住邊、點解冇小朋友，隨住朋友激動嘅質問，配樂亦變得緊張。

之係畫面變成彩色，亦見到機械人樣嘅Vision慢慢浮現，配上Scarlet Witch一句 「Is this really happening?」，似乎就係Scarlet Witch以超能力重新「創造」出Vision。後來又見Vision飛到一輛汽車之前，車上有如被石化、戴住巫師帽嘅女司機，被Vision掂一掂太陽穴先識郁，女司機問Vision：「我係咪死咗？」Vision答：「唔係！點解你會咁諗？」女人話：「因為你死咗！」然後開始狂笑，畫風再次變得黑暗懸疑。

睇返預告下嘅介紹，《WandaVision》係講Scarlet Witch及Vision兩個「超能力者過住理想化嘅郊區生活，但開始懷疑一切都係假嘅。」而有部份人應該會估到，劇集嘅骨幹應該係Marvel漫畫中「House of M」事件。卻說當時Scarlet Witch因為喪子後精神崩潰，以超能力「創造」出一個「人人都能滿足心中欲望嘅世界」，導致Iron-Man等超級英雄與Mageto家族 (漫畫中Scarlet Witch及QuickSilver係Mageto嘅子女) 嘅戰爭，最後更「消滅」世界上絕大部份變種人嘅超能力。雖然以目前Marvel宇宙嘅發展，《WandaVision》唔太可能跟足《House of M》嘅發展，但就有可能係一套有意思嘅「心理驚慄超級英雄片」？