早前舉行嘅艾美獎中，除咗頒發大家都好關注嘅劇集演技獎之外，其實仲有好多關注度較低嘅非劇集類獎項、以及各種技術獎，其中就有幾個與紀錄片有關嘅獎項，而National Geographic (國家地理雜誌)最近就喺Youtube公開咗其中幾套由佢哋製作，而又於Emmy獲得提名甚至獲獎嘅紀錄片供大家免費收看，仲有中文字幕！

《Cosmos: Possible Worlds》

《Cosmos: Possible Worlds》由美國著名天文學家Neil deGrasse Tyson主持，係2014年紀錄片《Cosmos: A Spacetime Odyssey》嘅續作，利用3D及2D動畫介紹宇宙發展嘅可能性，於今年艾美獎中獲得「突出個人動畫成就獎」。成個系列有13集，而National Geographic就於Youtube上公開第二集《The Fleeting Grace of the Habitable Zone (稍縱即逝的適居帶)》。

《Sea of Shadows》

講述墨西哥西岸漁民為咗捕獵魚膘可以整成花膠嘅「石首魚」，而於太平洋東岸設置非常漁網，結果危及生活於該海域、目前全球只剩不足30條嘅小頭鼠海豚嘅紀錄片。當中涵蓋動物保育、墨西哥黑幫、中國非法商人、墨西哥政府嘅腐敗等多個議題。甚至仲有抗議暴動、及開槍場面，過程非常緊湊。此系列獲提名最佳紀實節目攝影獎。

《The Cave》

獲得「紀實電影製作特別獎」及「最佳紀實節目攝影獎」嘅《The Cave》，追蹤於敘利亞戰火中，主理地下洞穴戰地醫院嘅幾位女性，小兒科醫生艾曼妮波勒和同事莎曼赫與亞菈醫生。講述佢哋於父權文化、長期空襲、物資短缺嘅情況下醫治傷病者嘅故事。