如果大家平時鍾意喺Youtube搵啲犯罪案件調查黎睇，相信一定有見過「D.B. Cooper劫機案」，「D.B. Cooper劫機案」由1971年發生到依家經過多次調查，但都未能搵到犯人「D.B. Cooper」究竟身在何方，甚至是生是死，令其成為美國最廣為人知嘅懸案之一。而紀錄片導演John Dower以「D.B. Cooper案」為題嘅紀錄片《The Mystery of D.B. Cooper》，將於11月26日於HBO Max播放，HBO方面亦釋出預告。

D.B. Cooper劫機案發生於1971年11月24日，當時一名化名「Dan Cooper」，西裝骨骨舉止有禮嘅中年白人男子，聲稱身上有炸彈以劫持一班由波特蘭飛往西雅圖的波音727客機，並要求20萬美金，以及4個降落傘，否則就會「做嘢 (Do the job)」。抵達西雅圖機場，拎咗錢同降落傘後，Dan Cooper釋放其中兩名空中服務員及所有乘客，並要求飛機再次升空，並以非常特定嘅方法 (降下起落架、機翼調至某個角度、飛行高度一萬尺以下、後機門打開) 飛往墨西哥。而途中，佢似乎就帶埋啲錢打開機門跳傘逃離，只遺下一條黑色領帶、八個煙頭於機上。

事後美國相關部門展開多次大規模調查，但依然冇辦法搵到Dan Cooper、佢袋錢、甚至降落傘嘅任何線索，亦令此案成為懸案。

個人非常推薦Lemmino於半年前製作嘅D.B. Cooper案影片

由於D.B. Cooper案實在太出名，網上有多名創作者都曾經介紹過此案，包括近年於華文圈中人氣急升的「老高」、被Reddit用家推出神檯嘅「Lemmino」，又或者台灣地區非常出名嘅「X調查」。D.B. Cooper甚至被寫入人氣劇集《Prison Break》當中。相信當《The Mystery of D.B. Cooper》播出後，又會造成另一輪嘅熱議。