繼7月時與AMC簽訂新協議，縮短電影嘅「院線限定」時間，環球電影 (Universal Pictures) 近日與北美另一大型院線Cinemark達成類似協議，環球及旗下Focus電影最快會於上映後17日登上線上平台播放。

自環球與AMC於7月簽訂協議，令電影嘅「院線限定」時間縮短到17日後，作為美國第三大院線嘅Cinemark亦自行跟隨相關安排，縮短環球電影嘅播放檔期，換言之今次簽訂新協議只係令到件事更加明確咁解。不過根據《Deadline》報導，環球與Cinemark嘅協議中有一個新條款，就係萬一電影於開畫週末嘅美國本土票房高過5000萬美金，「院線限定」時間就自動延長至5個星期。

另外，「院線限定」時間到咗之後，環球係「有權選擇」將電影放到各個線上平台作付費串流，而院線就會分到其中大約1-2%嘅收益。

根據目前疲情，相信美國有排都唔會出現「開畫週末票房高過5000萬」嘅電影，換言之絕大部份電影都能夠於上映17日後轉到線上平台，吸納入唔到、或唔敢入場嘅觀眾，加快片方回本時間。而院線分得嘅串流收入亦可以幫補下冇人入場嘅收入下跌，某程度黎講都算係Win Win雙贏。不過美國第二大院線Cineworld主席Mooky Greidinger早於7月時就向環球及AMC嘅協議大潑冷水，形容縮短院線限定時間係「錯誤嘅時間錯誤嘅決定」。