80年前，亦即係1940年，除左係正值第二次世界大戰之外，亦係一名世界知名嘅武打巨星嘅誕生，佢就係截拳道嘅創始人 - 李小龍。而今日11月27日，正正就係李小龍80週年誕辰，呢位巨星雖然在世只有短短32年時間，卻影響住後世非常多嘅人，其中包括香港雙截棍總會主席劉萬梁師傅。

適逢李小龍先生誕辰80週年，MenClub今次特別找來劉師傅講下李小龍及雙截棍，究竟一位已經離開世界50多年嘅偉人如何改變人心。

截拳道：由李小龍先生從個人武學修練中領悟出來，以無限為有限，以無法為有法，無招無式無套路，意即Be Water，完全打破傳統武術哲學。

而今日從李小龍先生身上傳承過來嘅雙截棍道，就由劉師傅作為掌舵人，希望可以以不同方式去展現人前，從而令更多人認識雙截棍文化、歷史、流傳，讓大家唔再係停留電影，或對雙截棍有任何誤解。

劉師傅講述，雙截棍道有8句格言：知禮、感恩、專注、堅持、自信、自律、擔當、分享，透過呢8句格言統一規範一眾師生，令佢地訓練期間無論喺武德、紀律上都可以更加專注及明白。

而在今年的疫情之下，劉師傅坦言影響不小，其中所有訓練班都要停止，但本住李小龍先生Be Water精神，面對任何境況都可以因時制宜，所以佢地決定喺網上進行教學。不過雙截棍作為武器，平日當然唔可以帶出街，如果唔係隨時就會被人告藏有攻擊性武器架啦，所以唔係每個人都擁有自己嘅雙截棍。因此，劉師傅以毛巾代替雙截棍，只要將其前後打結，就成為擁有雙截棍結構嘅物品，在家安心上堂，同時亦印證了雙截棍Be Water生活化的展現。

不過始終較為可惜嘅係，今年係李小龍先生80週年誕辰，劉師傅已於2019年開始聯合準備舉辦多項紀念活動，其中包括音樂、大型雙截棍表現，但因疫情一一被迫暫停及取消。不過劉師傅堅毅嘅性格並未有被打沉，佢繼續推出80週年相關產品，其中包括李小龍先生著名電影《死亡遊戲》嘅VR動態畫面及推出一件80週年紀念Tee，從而作出致敬。另外，劉師傅亦特別點名提到，著名漫畫家崔成安先生畫出一幅長達50呎嘅李小龍紀念作品，大家一定要留意！！