Bandai旗下扭蛋部門GASHAPON有個HG系列，專門推出體積細但造型精美嘅模型，而呢個系列嘅最新作，就係日本特攝《超級戰隊》中嘅五星戰隊！

我知《五星戰隊》未必係最多人識嘅超級戰隊系列，但當年我就被佢嘅功夫武俠背景吸引，個個星期我都特登開亞視黎追。而呢Set HG系列雖然只有7.5至11CM高，但就非常仔細地還原五位戰士嘅造型，特別係頭盔、腰帶嘅等塗裝，以及戰鬥服嘅皺摺等都能夠以假亂真，動作方面就重現原作中每個角色嘅拳法，動感及比例都冇可挑剔。