自從疫情開始、戲院唔開，各大片商就面對「電影上映都冇人入戲院睇」嘅困境，而擁有自家串流平台嘅片商，就開始將部份電影搬到自家串流平台上映以減輕損失，同時帶動串流平台訂閱人數，當時就有估計，呢種做法有可能影響整個電影業嘅生態。而華納就決定率先踏出呢步，宣佈明年所有電影都會於HBO Max同步上映。

所謂「同步上映」，係指華納明年上映嘅所有電影，除咗會於院線播放外 (如果戲院有開)，亦會同步放上HBO Max播放一個月，亦即係上映頭一個月觀眾可以揀入場或者上HBO Max睇，一個月之後就只有戲院有得睇 (如果套戲仲上緊)，而當戲院都落埋之後，過一段時間後套戲就會再擺返上其他串流平台以及HBO Max——基本上就即係黎緊《Wonder Woman 1984》嘅上映方法。

而「明年所有電影」個陣容就不得了囉，目前華納名下預計2021年上映嘅部份電影包括Denzel Washington主演嘅犯罪電影《The Little Things》、《Godzilla vs Kong》、《The Conjuring 3》、著名音樂劇改篇嘅同名作《In The Heights》、LeBron James主演嘅《Space Jam 2 (太空也入樽)》、新《Suicide Squad》同我個人好期待嘅《Dune》，仲有《Matrix 4》添。基本上一個正常觀眾都一定會入場睇一兩套，對帶動HBO Max嘅訂閱人數有極大作用。

《Space Jam 2》

《Suicide Squad》

《Dune》

《In The Heights》

華納就話新上映策略會試行一年，但普遍估計呢個新策略會成為華納嘅「New Normal」，亦可能會吸引其他片方，尤其係同樣有自家串流平台、又已經試過將電影直上串流平台播放嘅片方 (係呀，即係Disney呀)跟隨。而喺冇HBO Max嘅地區，電影就會如常作院線上映。