日本動漫真人化唔係咩新鮮事，但有啲動畫真係諗下都知唔多適合真人化，例如「富奸」嘅成名作《幽遊白書》，淨係戶愚呂兄弟你都想像唔到真人化要點拍啦？——不過大家都唔使「想像」啦，因為Netflix宣佈會開拍真人版《幽遊白書》劇集，大家到時用自己對眼睇清楚啦！

據Netflix公告，真人版《幽遊白書》將由《全裸監督》嘅坂本和隆擔任執行製作，而製作公司就交由啱啱製作出漫改真人日劇《今際之國的有栖》嘅「ROBOT」負責，算係稍稍增加咗大家對《幽遊白書》真人版嘅信心。目前Netflix未公佈任何選角，日本網民亦非常在意邊個出演「戶愚呂兄弟」，據知令「戶愚呂」成為日本Twitter熱搜字。有歐美網民就話搵《Game of Thrones》中嘅Peter Dinklage主演喎，大家又點睇？