對於好多七、八十後黎講，去機鋪打機係一件非常值得懷緬嘅事——一方面係因為嗰時打得好開心，二來因為依家絕大部份人都唔會再去機鋪、啲機鋪都變哂賭檔啦嘛！咁如果你想重溫一下打街機嘅樂趣，就可以留意一下日前正式推出嘅SEGA Astro City Min啦。

圖片：SEGA

早於7月時就已經公佈會推出，Astro City Mini終於喺日前正式推出。呢部大小只有13cm x 17cm x 17cm嘅小型街機，係參照SEGA於1993年推出嘅街機Astro City，再按1/6比例縮小而成，機仔細細但有Mon，有搖桿加六粒掣，後面仲有HDMI位駁電視，以及兩個USB位用黎插週邊——包括一個大掣同一個手掣，當然係要另外畀錢買。另外仲可以買埋個地台加張櫈，重現整台街機。

圖片：SEGA

而機入面就預先收錄37隻遊戲，全部都係80年代尾、90年代頭嘅作品。售價方面主機同大掣都係12,800Yen (約HK$960)、手掣就2,780Yen (約HK$208)、地台同張櫈就3,980Yen (約HK$300)。