馬來西亞網紅Uncle Roger（原名：Nigel Ng 黃瑾瑜）去年以諷刺BBC飲食節目主持人Hersha Patel一條炒飯教學片而聲名大噪，以幽默諷刺風格收獲大量粉絲，Youtube Channel擁有高達319萬訂閱。

最近佢同另一名美食Youtuber Mike Chen合作製作影片「Uncle Roger Review UGLIEST DUMPLINGS EVER」。兩位一齊評論一條有關燒賣及餃子製作影片，點知條片出街後遭到大量中國網友抵制檢舉，原因在於合作夥伴Mike Chen曾發表「不當言論」。

合作夥伴Mike Chen被中國網友發現佢經常喺個人IG及Twitter轉發批評中國言論，影片隨即受到大量中國網友檢舉及負評。Uncle Roger尋日就喺微博上發表中英雙語道歉聲明，表示對於影片引發不好社會影響而感到非常抱歉，同時已將相關影片下架。強調並不了解合作對象政治想法及不正確言論，實屬係自己疏忽，希望網友可以比個機會佢改進。

對於今次Uncle Roger處理手法同速度，中國網友表示相當滿意及支持，希望Uncle Roger下次唔好咁大意。