由香港「禮嘉玩具」成立嘅Flame Toys宣佈推出全新系列「合機巧」，並獲得孩之寶授權，第一款作品就係美版《恐龍戰隊 (Power Rangers)》嘅合體機械人「大獸神」！

圖片：Flame Toys

雖然目前就只係得一張設計圖片咁大把，但Flame Toys嘅「合機巧」大獸神同原版都有唔少分別。首先最明顯嘅就係背後多咗對翼，頭部設計亦稍有不同，胸甲灰色部份原本只係一堆三角型，但「合機巧」就變成一排極銳利嘅牙齒。另外全身線條都明顯經過粗獷化，手腳比例亦增粗，睇落有幾分「勇者王」嘅感覺。

另外「合機巧」主打「變形合體」，所以有理由估計呢隻大獸神都一樣可以分返開做五部機，再加上超合金部件，確係幾吸引嘅。不過目前實際設計、開售日期同價錢全部未知，想留意就要留意Flame Toys之後嘅公佈啦！