多得科技進步，男女之間最親密「安全距離」已縮窄到0.01mm，如果想再親密啲就可能要靠藥物或運氣。最近美國北卡羅萊納州立大學研究人員正開發緊一種集合「殺精、抗病毒、增強性欲」三種功能嘅凝膠，有望為全人類提供新避孕方法。

呢種神奇凝膠成份主要由Carbomer（聚丙烯酸）做基劑，再添加避孕藥Gossypol（棉酚）、 抗疾毒藥Tenofovir（韋瑞德）同可以刺激「細佬」血流嘅Nitroglycerin（硝酸甘油）組成。

使用不同濃度Gossypol時，凝膠殺精及抗病毒實驗結果（圖片：Bioactive Materials）

係體外實驗證明，當凝膠含有10μg/ml濃度Gossypol時，能夠喺30秒內有效殺死100%豬精子，就算凝膠使用較低濃度Gossypol，都能夠喺180秒內殺死所有豬精子。而且抗病毒性實驗證明，凝膠能抑制「慢病毒」（HIV-1其中一種）。

大家可能會好奇啲膠咁勁，抗疾毒又殺精，會唔會傷到「細佬」或陰道㗎？實驗比對使用凝膠前及使用凝膠後陰道上皮細胞，發現凝膠並唔會損害上皮細胞。簡單嚟講即係唔會有事，但會唔會引起皮膚敏感就要做更多研究。除咗體外實驗，研究人員更用老鼠做實驗，結果顯示疑膠有效避孕，而且當凝膠搽喺老鼠「細佬」後，發現老鼠會更快勃起同更頻繁交配。